निर्वाचनको मिति कानूनमै व्यवस्था गर्न आयोगको सरकारसँग आग्रह

काठमाडाैं – निर्वाचन आयोगले निर्वाचनको मिति कानूनमै व्यवस्था गर्न सरकारसँग आग्रह गरेको छ। प्रमुख निर्वाचन आयुक्त अयोधीप्रसाद यादवले निर्वाचनको मिति कानूनमै व्यवस्था गरे निर्वाचनको मिति सर्नेलगायतका ३० वटाभन्दा बढी निर्वाचनसम्बन्धी समस्या स्वतहः समाधान हुने पनि स्पष्ट पारे।

आइतबार काठमाडौंमा आयोजित ‘नेपालको निर्वाचन कानूनी संरचना’ विषयक कार्यशाला गोष्ठीमा बोल्दै उनले निर्वाचनको मिति घोषणा गर्ने अधिकार निर्वाचन आयोगलाई दिनुपर्ने आयोगको अडान पनि दोहोर्‍याए। प्रमुख निर्वाचन आयुक्त यादवले खर्च कम हुने उल्लेख गर्दै मतदानस्थलमै मतगणना हुने कानूनी व्यवस्था गर्न पनि सरकारको गम्भीर ध्यानाकर्षण गराए।

पूर्व निर्वाचन आयुक्त भोजराज पोखरेलले निर्वाचन अपराध अदालत गठन गर्न सरकारलाई सुझाव दिए। सरकार र निर्वाचन आयोगलाई विवादमा आउन नदिन पनि निर्वाचनको अपराध हेर्न निर्वाचन अपराध अदालत गठन गर्न आवश्यक रहेको उनको तर्क थियो। कार्यक्रममा पूर्व प्रमुख निर्वाचन आयुक्तद्वय सूर्यप्रसाद श्रेष्ठ र निलकण्ठ उप्रेतीले निर्वाचन कानून सुधारको आवश्यकता र औचित्यको बारेमा प्रकाश पारे।

तपाईको प्रतिक्रिया

सम्बन्धित समाचार